Tesla మోడల్ 3 త్వరలో భారతదేశంలో లాంచ్ కాబోతోంది. మార్కెట్ వర్గాల అంచనాల ప్రకారం, దీని ప్రారంభ ధర సుమారు ₹35-40 లక్షల మధ్య ఉండే అవకాశం ఉంది. అయితే, దిగుమతి సుంకాలు, పన్నులు లాంటి కారణాల వల్ల ఖర్చు మరింత పెరిగే అవకాశం ఉంది. ఇది తక్కువ ధరలో కార్లను కోరుకునే భారత వినియోగదారులకు పెద్ద సవాలు కావొచ్చు.
అమెరికాలో టెస్లా మోడల్ 3 ప్రారంభ ధర సుమారు 35,000 డాలర్లు (సుమారు ₹30.4 లక్షలు). కానీ భారత మార్కెట్లో ఎలక్ట్రిక్ వాహనాలపై అధిక దిగుమతి సుంకాల కారణంగా దీని ధర మరింత పెరిగే అవకాశం ఉంది. ప్రస్తుతం దేశీయంగా ఉత్పత్తి అవుతున్న మహీంద్రా XEV 9e, హ్యుందాయ్ e-క్రెటా, మారుతి సుజుకి e-విటారా లాంటి కార్లతో పోలిస్తే ఇది 20-50% అధికంగా ఉండొచ్చు.
భారతదేశంలో TESLA వ్యూహం
టెస్లా భారతదేశంలో పోటీని ఎదుర్కొనడానికి స్థానిక ఉత్పత్తిని ప్రోత్సహించే అవకాశాన్ని పరిశీలిస్తోంది. ఈ లక్ష్యంతోనే, కేంద్ర ప్రభుత్వం విదేశీ కంపెనీల పెట్టుబడులను ఆకర్షించేందుకు దిగుమతి సుంకాలను 15% వరకు తగ్గించేందుకు యోచిస్తోంది. టెస్లా స్థానికంగా తయారీ యూనిట్ ఏర్పాటు చేస్తే, ఈ కార్ల ధరలను కొంతవరకు తగ్గించి మరింత మందికి అందుబాటులోకి తేవచ్చు.
భారత వినియోగదారులు ప్రధానంగా తక్కువ ధరలో అధిక విలువ కలిగిన వాహనాలను కోరుతారు. ఉదాహరణకు, హార్లే-డేవిడ్సన్ X440 మోటార్‌బైక్ ధర రాయల్ ఎన్‌ఫీల్డ్ క్లాసిక్ 350 కంటే 20% ఎక్కువ ఉంది. దీని ప్రభావంగా, X440 నెలకు సుమారు 1,500 యూనిట్లు మాత్రమే అమ్ముడవుతుంటే, క్లాసిక్ 350 మాత్రం 28,000 యూనిట్లు విక్రయమవుతోంది. ఇదే విధంగా, టెస్లా కూడా భారత మార్కెట్లో విజయవంతం కావాలంటే పోటీ ధరలను అందించాల్సిన అవసరం ఉంది.
ప్రస్తుతం, టెస్లా భారతదేశంలో తన కార్యకలాపాలను ఢిల్లీ, ముంబై నగరాల్లో ప్రారంభించేందుకు ప్రణాళికలు రూపొందిస్తోంది. ఈ వాహనాలు దేశీయ మార్కెట్లో ఎలా స్థిరపడతాయో చూడాల్సి ఉంది.
